高錕喺頒獎典禮上所着嘅燕尾禮服係租番嚟，無法留為紀念，大家於是將目光轉移到高太身上，原來典禮後，香港唔少博物館及學校都打高太主意，希望高太捐出呢件喺香港度身訂造、咁有紀念價值嘅戰衣出嚟做展品，供市民觀賞；即使無得去頒獎禮，都可感受吓當時衣香鬢影嘅場面。為此高太仲頭痛緊，諗住到農曆新年返香港嗰陣，先至決定捐畀邊個。

高錕返港過農曆新年，大家爭住同佢見面送上祝賀，高太尋日話，知道咁多市民對佢哋回港有咁多查詢，佢同高錕都覺得好溫馨，只係時間尚早，行程仲未落實。不過，高錕已答應出席母校聖若瑟書院喺二月七日舉行嘅開放日，學校仲忙緊整本高錕特刊，搵高錕舊同學分享佢哋讀書時嘅趣事，但校方話高太為確保丈夫安全，唔想畀大批傳媒追訪，校方可能要請保安護送高錕。