江山易改，本性難移，人稱「周一鑊」嘅前食衞局局長周一嶽被港府叮走之後，以為佢會自動消失喇，點知呢塊舊電池居然獲翻叮為平機會主席，而且一樣係無事生非，唯恐天下不亂。
係咁嘅，港府先後訂立咗四條反歧視條例，《性別歧視條例》、《殘疾歧視條例》、《家庭崗位歧視條例》及《種族歧視條例》，一直相安無事，弊在平機會不甘寂寞，竟建議大幅修改條例，包括就「族內歧視」立法，同埋將異性及同性關係嘅「事實婚姻」納入保障範圍，結果引來多個團體聲討，搞到滿城風雨。
即係咁，檢討歧視條例唔係唔得，問題係平機會好做唔做，所謂嘅保障「族內歧視」及「事實婚姻」，既冇迫切性，爭議又大，純屬阿茂整餅，冇嗰樣整嗰樣。就講「族內歧視」吖，家陣中港矛盾愈演愈烈，平機會建議將內地旅客及新移民納入「受保護」範圍，罵「蝗蟲」即屬犯法，表面上係保障內地旅客，實際上係火上加油。係人都知，內地人同香港人同文同種，平機會用種族歧視條例作出區分，即係將內地人當成外族人，本身已經係一種歧視喇。
正如有人話齋，香港人唔係歧視內地人，而係對部分旅客嘅不文明行為反感，當局唔去糾正不文明行為，反而以立法來製造爭議，簡直係本末倒置。難怪「東方報業民意調查」顯示，四成受訪者批評將遊客無公德及不守法行為與種族歧視混為一談；三成三直指進一步激化中港矛盾；兩成二直斥平機會濫權，小題大做。
至於所謂保障「事實婚姻」，更加係無厘頭，係人都知香港社會比較保守，平機會建議將現行條例中嘅「婚姻關係狀況」修訂為「伴侶關係狀況」，一併保障異性及同性嘅「事實婚姻」，簡直係搵嘢嚟做，徒惹爭拗。正如上述民調顯示，四成一受訪者直指社會對有關修訂未有共識，爭議極大；兩成五擔心討論同性戀話題，隨時誤墮法網；一成四認為是強迫社會認同同性關係。
話時話，家陣社會愈來愈政治化，本來已經紛紛擾擾，嘈喧巴閉，平機會仲要踩多一腳，你話係咪添煩添亂吖？如果話唔係出於周一鑊嘅私心，細路仔都唔信嘞。正如有立法會議員指出，周一鑊做官嘅時候已經臭名遠播，港府對呢塊舊電池居然不離不棄，畀佢執掌平機會主席呢個肥缺，直頭係唔衰攞嚟衰。所以話，慶父不死，魯難未已，咪以為周一鑊真係咁好心幫弱勢社群出頭呀，佢只不過想出風頭，為自己連任鋪路咋！