G.E.M.初夜只益老公

昨日G.E.M.穿上Tube Dress出席代言的「SKECHERS Get Everyone Moving」時裝騷，同場還有Jessica C.和諸葛梓岐擔任模特兒，G.E.M.即場唱歌助興。對鄭中基與蔡卓妍分手，G.E.M.一臉愕然更說從不知他倆走在一起，曾揚言擇偶喜歡才子的她，可會揀鄭中基？G.E.M.說：「我淨係見過佢兩次面。（佢係咪你杯茶？）我都唔識佢，我要由朋友開始了解再慢慢發展。」

要對陳柏宇冷淡

問及跟側田發展如何？G.E.M.笑說：「佢見到我特登扮到阿伯咁，話大我十六年，叫我唔好扯佢落水，所以我依家要講清楚，我同佢點都冇可能，我係鍾意成熟，但十六年相差太遠喇，可能第時嗰個年紀相差更加大，但一定唔會係側田。（陳柏宇呢？）我要對佢冷淡啲，因為佢話我太熱情，所以我要對佢冷淡啲。（咁狄易達呢？）其實佢哋同我太熟，先會公開攞出嚟講，大家唔係真。」

G.E.M.表示與陳柏宇（中）及側田（右）都沒有可能拍拖。（資料圖片）

Jessica C.（右）、諸葛梓岐（左）行騷，G.E.M.則任表演嘉賓。

結婚先至拆禮物

問到可會接受矮過自己的男孩子？她笑說：「矮過我都好難，我已經好矮。（王祖藍呢？）佢高過我o架，佢OKo架，因為佢係基督徒，我想另一半都係基督徒。（唔會婚前性行為？）呢個好緊要，我覺得呢樣嘢係神畀夫婦嘅禮物，好似生日禮物咁，要生日先拆，否則就冇得拆。（冇得包番埋？）其實可以包番埋，只要任何人同神認錯，話唔再做，之後就係一個新嘅人。不過我希望等到我結婚先拆，如果兩個都係基督徒，大家情到濃時互相提點都係一種浪漫。」

同場的諸葛梓岐與一對混血小朋友一同行騷，坦言與男友都很喜歡小朋友，不過現在兩人還未有計劃，笑言大家都有第三者——工作。她又謂其中一位小朋友在後台指她很胖，後來才得知對方是讚她好身材。

Jessica C.（左）與諸葛梓岐展現活力一面。

諸葛梓岐很喜歡小朋友，但未有計劃結婚生B。

文：名人組