幽靈車神着晒火

三大高手主理

近年改篇自Marvel漫畫嘅電影作品多不勝數，《蜘蛛俠》、《鐵甲奇俠》部部大收，惟獨《幽靈車神》（Ghost Rider）有影帝Nicolas Cage坐鎮，但口碑票房卻雙雙仆直。即使這樣，其一身黑皮褸加骷髏魔嘅SM造型，卻叫不少玩具迷大呼過癮，繼孩之寶及Medicom後，本地Figure大廠Hot Toys亦終於取得電影版權。為滿足Fans，今次HT特別請來3大猛人合作，GOX雕頭、JC.Hong上色再由Kojun監修，單係Nicolas個頭就經過4次初版才完成，結果係臉頰、大鼻及頭髮都似足戲中人，只是略嫌雙眼過於憂鬱，與車神造型唔多夾。

星雲鎖鏈可掛於身上，跟足電影戲服。

呢款Figure其實一早造好，之所以遲遲唔出，全因HT想整好個頭雕。右方係完成品，左面為初版，可見前者塊臉較細較瘦，雙眼亦略為下垂，較貼近戲中神態。

PVC膠變火燄

除了以上3位大師，本地著名生化造型師Joseph Tsang亦有參與骷髏頭製作。據Joseph表示，要雕製亦正亦邪嘅骷髏頭唔難，難在頭上地獄火沒有固定形態，電影就話可以用CG交代，Figure則以半透明PVC膠造出層層Layer，再在頸上Ball Joint位鑲入LED燈，那麼開着後就會透出橙黃光芒，效果夠晒逼真。另一方面，骷髏頭經過塗裝後，顏色、裂紋都可與真頭骨相比，加上顎骨能上下開合，唔講仲以為係醫學模型。

骷髏頭塗裝逼真，四邊火燄則係半透明PVC膠，着燈後就見到「熊熊烈火」。	前臂窩釘係人手逐粒鑲入，唔似得其他玩具廠直頭唔整咁求其！	皮Boot係人造皮，無論質感及光澤，都可與實物相比。

終於有車揸

有名你叫Ghost Rider，冇咗部烈火戰車又點似樣？但搞笑係以前出親玩具都被抽走，因此今次HT造埋架戰車出來就更見難得。呢部分亦係由Joseph操刀，無論比例、結構都跟足電影劇照製作，所以把手、Seat位到死氣喉都滿布Bio Tech花紋，而最正係前後輪都識得郁，真係行得走得，唔係得個樣。至於服飾，黑皮褸為人造皮，膊頭、前臂都有窩釘，而且緊身得嚟有少許虛位，點郁都唔爆胎！相對起來，配件就較失色，除咗條星雲鎖鏈外，便只有霰彈槍及兩對可換手掌，玩家惟有另購補品了！

兩個轆都識得郁，廠方更話正式推出時所有火燄位都會加入LED燈，可以想像着晒燈時搶到爆！	成車都係Bio Tech花紋，死氣喉位仲勁有立體感。	配件唔多，得鎖鏈、霰彈槍同兩對可換手掌。

零售價︰$1,780　

預訂價︰$1,750

推出日期︰今年第4季至明年第1季

撰文 ：陳志滔

攝影 ：胡淑儀

查詢電話 ：2388 4677