還記得上年四月開始，陽光已經開始大減價，我已經可以開始當沙灘大王，沙灘大王的意思是逢周六周日，只要沒有工作，只要沒有下雨，只要有陽光，我們一班潮流達人，就會去大浪灣，享受可能過多十幾二十年就會消失的陽光……

今年真的等到我們頸都長，有無搞錯！今年的夏天好似來遲了，日前我才第一次做沙灘大王，為了慶祝第一次沙灘大王，我們一班潮人不去大浪灣，我們決定去……登登登登……大嶼山的長沙，嘩！好遠呀！認真的，真的好遠……不過，是好值！

長沙是一個好靚好悠閒的沙灘，又大又少人，超舒服，講真，如果個沙灘好似個墟同街市的話，真係無晒心情去享受陽光，又逼又多人，不停有人喺你前後左右走來走去，靚人都話無所謂，唔靚的就真的……多謝晒！

所以今年的首次沙灘大王，是非常之樂而忘返的，就是因為太樂而忘返的關係，所以我們全部人都曬到燶咗！不過，無所謂啦！因為我真的好慶幸我仍然有機會曬燶，好好珍惜我們可愛的陽光！兄弟姊妹們。

時裝設計師