成日喺粵語長片都會聽到呢句說話：「冇番咁上下斤両，我又點會嚟挑戰呢個盟主寶座呀？」

冇錯，魔術都係，佢哋嘅外圍投射真係有番咁上下斤両，喺總決賽Game3，魔術造出破NBA總決賽史上紀錄嘅62.5%投射命中率，成功以一○八比一○四擊敗湖人，總場數追貼一比二，聽朝兩雄再遇，手感咁好嘅魔術，相信可以憑主場之利追多一場。（有線165台、now 670、高清翡翠台及廣東體育周五早上9時直播）

高命中率創紀錄

由於過去NBA歷史上，從未有球隊可以喺總決賽總場數落後○比三之後反勝，所以今場對於落後○比二嘅魔術嚟講，同生死戰冇乜分別。

嚟到生死關頭，魔術再次發揮出佢哋嘅小宇宙，以六十四射四十中嘅62.5%投射命中率，顯示球隊嘅得分能力，其實魔術半場仲勁，三十二射廿四中，命中率高達75%，只不過下半場稍稍回氣。

總場數追近一比二

除咗「超人」杜域侯活射入廿一分搶到十四個籃板球，另四名魔術球員得分亦達雙位數字，劉易斯廿一分、艾斯頓廿分、陶告魯及比杜斯十八分，個個都着晒火。雖然湖人亦有五人得分達雙位數，包括高比拜仁卅一分及加素廿三分，但未能頂住魔術主場氣勢，魔術以一○八比一○四贏波。

避免落後○比三，魔術梗係趁機追多場啦，被問及有冇信心成為史上第四支落後兩場之後反勝嘅球隊，主將陶告魯好有信心咁講：「Why not?」既然球員有信心又有手感，聽朝再喺主場出擊，當然有望贏多場啦！