中環出更：改革港台 議員促政府定期匯報
年花10億港元公帑嘅香港電台（港台）劣評如潮，被批評立場偏頗，被唔少市民投訴。立法會資訊科技及廣播事務委員會尋日舉行會議時，多名議員要求討論改革港台同埋要求政府交代港台嘅最新動向。
委員會主席何君堯話早前港台一名編導因查冊時涉作虛假聲明被捕，又有議員致函要求討論港台節目報道屯門青山灣入境事務中心一事，所以希望喺今年第二季於會上一次過討論港台工作及改革情況喎。
立場偏頗 多市民投訴
有份致函嘅議員葛珮帆就好支持何君堯嘅建議，仲話自己過去一直都要求港台進行改革，雖然政府話將會就港台工作進行大檢討，但佢就每天都仲收到市民投訴，所以覺得事務委員會應該設一個環節討論港台問題。
另一名議員陳恒鑌早前就港台存廢問題展開民意調查，佢喺會議上亦話社會對港台意見愈嚟愈多，希望政府可以每幾個月就出席一次事務委員會會議作匯報，向公眾交代港台最新動向及政府取態。
咁講，睇嚟負責港台嘅廣播處處長梁家榮同商務及經濟發展局局長邱騰華都走唔甩，要去立會解畫喇！