中環出更：許晉平甜住逛ifc
尋日下午約三點四十分，中建企業董事許晉平現身中環ifc商場，偷閒逛蘋果電腦專門店、歎意大利名牌雪糕，但就唔見甜蜜女友「九巴金公主」伍穎梅（Winnie）。卓妮向前同許生打招呼，梗要追問佢同Winnie幾時拉埋天窗，佢甜笑話：「到時通知你！」咦！點解同Winnie嘅口徑咁一致嘅？
潮買iwatchz送自己
卓妮行過ifc蘋果電腦專門店，見許晉平攞出二百蚊找數後，抽住個膠袋行出店舖。原來佢都係粉絲，特登嚟買ipod嘅配件iwatchz，咁就可以將ipod變身為手錶，認真夠潮。卓妮問佢係咪買嚟送畀女友，佢笑稱唔係，係自己戴喎！
跟住佢直行到商場內嘅超級市場city'super，喺麵包舖兜咗個大圈，可能搵唔到佢嘅心水，無功而返。然後行到附近嘅iScream雪糕店買杯雪糕，一路食一路朝住中建大廈方向行，見佢食得好滋味，認真童心未泯。