中環出更：小朋友冇學返 陳李妮搵私人教師返屋企教
疫情反覆，由爆發至今都接近一年，市民都要改變生活習慣去適應與疫共存嘅「新常態」。博愛醫院前主席陳李妮（Lily）都大嘆受疫情影響，話阿女冇得返學，惟有自己諗計教佢啦！
卓妮早兩日喺馬場撞見近年專心喺屋企湊細路嘅Lily，佢話自己公司好在有班得力同事睇住，但照顧小朋友嘅責任就要親力親為。Lily話小朋友冇得返學，惟有自己搵私人教師返屋企教佢哋語文同畫畫，雖然疫情持續，好在香港市民自我防疫工夫做得好好，反而政府嘅抗疫政策就一時一樣做得麻麻喇！佢又話若果政府要推全民強制檢測加禁足令，一定計清楚條數，包括市民要承受嘅影響同點樣去幫助受影響嘅市民，無謂又要市民白白捱苦啦！
轉頭見到善德基金會副主席梁天富（Eddie）同太太Tina。同樣要喺屋企睇住3個小朋友嘅Tina就話雖然緊張疫情，但唔忍心小朋友長期困喺屋企，所以會四出搵啲空曠兼冇乜人嘅公園等佢哋呼吸吓新鮮空氣。
從事展覽行業嘅Eddie就話疫情唔止影響佢哋搞展覽，連帶負責布置場地嘅公司都冇工開零收入，但覺得政府似乎忽視咗呢班人，佢又比喻疫情如同一個殺人狂，政府只係叫市民匿埋喺屋企唔好畀佢殺，但又唔去捉佢喎，根本唔治本，抗疫成年都搞唔掂就即係話政策存在問題，佢明白自由係重要，但寧願「引刀成一快」，犧牲少少自由換取將來嘅自由，盡快實施全民強制檢測早日通關先係救港經濟嘅良方。
吳清煥：港抗疫政策欠決斷
香港中華廠商會常務會董吳清煥同佢囡囡Jacklyn亦入咗馬場，雖然阿女大個唔使佢湊，但講起政府抗疫吳清煥就一肚火，佢話政府政策唔夠決斷，若果當時關口管得好，就唔會有外來染疫船員周圍走事件，明明內地抗疫工作做得咁好，政府都唔參考吓點做，最離譜係到今時今日，檢測一幢大廈嘅居民竟然要用超過一個星期時間，做得咁差竟然冇官員要問責。佢話一日未搞得掂疫情，香港都唔使諗經濟，睇嚟政府比起新冠病毒更傷港人心喎。
卓妮