中環出更：銅芯口罩被嘲底褲 薛永恒竟話似自己
政府年初為應對「口罩荒」提出預留8億元推行「銅芯抗疫口罩」計劃，但口罩外觀被嘲似足底褲，亦較少市民使用，最後只派發約1,030萬個口罩，埋單就用咗約二億港元。不過，創新及科技局局長薛永恒尋日出席電台節目時，被問到外界嘅批評時就繼續死撐，話呢款似足內衣褲嘅口罩同自己一樣「內斂、實在」，強調政府冇使冤枉錢喎。睇嚟薛永恒仲未肯承認呢場「口罩騷」爛尾喎！
上任後「第一個BB」
薛仲話即使有人覺得口罩外觀似底褲都覺得無問題，認為銅芯口罩如內衣褲亦要經常清洗同佩戴；又指銅芯口罩係佢上任後「第一個BB」，自推出後自己只佩戴呢款口罩。
至於有醫護人員唔接受市民佩戴銅芯口罩進入醫院，薛永恒就強調口罩由專業人員研發，及確保其防疫抗疫功能符合國際標準，但都明白醫院擔心有人未能適當清洗口罩，為保障醫護人員及病人，先有較嚴格要求。
另外，佢早前申報其家人購買一個沙田單位作自住用途，被問到新屋會唔會設計成智能家居呢？佢就話自己與家人都係同87歲媽媽一齊住，所以都要確保對方識得用，強調需要取得平衡，唔可以「為科技而科技」喎。
卓妮