中環出更：洗手間創智能系統 許浚傑：乾淨廁格有得揀
相信大家去洗手間嘅時候，都試過入咗一格唔乾淨嘅廁格，但係原來依家已經有科技可以幫到我哋解決呢個小問題，一間本地企業對企業物聯網公司，憑住研發智能洗手間AloT系統，奪得資訊科技初創企業獎，始創人及行政總裁許浚傑話，用戶可以經由洗手間外嘅指示牌，知道洗手間嘅空置廁格數量，更可透過其他使用者分數評級，了解廁格嘅乾淨程度。
許浚傑及同為始創人嘅營運總裁萬笑歌早前出席「2020香港資訊及通訊科技獎」頒獎典禮，佢哋嘅雲端AloT管理方案可以畀到物業管理公司一個全新嘅洗手間管理方式，物管高層可以快速瀏覽所有洗手間各種情況，包括消耗品數量、使用同衞生情況，清潔工人亦可以喺系統上嘅列表睇到有邊啲工作需要做。
林潤生研AI語音分析
獲頒金融科技獎嘅本地科技公司研發人工智能語音分析系統，首席科學家及首席技術官林潤生話，公司利用語音識別同自然語言處理技術，將對話內容由語音轉成文字，對文字內容進行理解同分析。佢又話產品特性唔單止準確作語音識別同AI識別理解每一句對話含意，更可利用唔同報表同多種統計方式，進行業務情況深入分析，系統能夠幫助企業全方面審查客戶服務同銷售過程入面嘅合規風險。
奪得學生創新獎嘅香港城市大學醫學工程系學生李曉婷，研發「可穿戴紗線應變傳感器」，佢話戴咗傳感器之後同平時着衫冇分別，唔會覺得有電子物料喺裏面，通過紗線應變傳感器採集到嘅數據，用AI嘅方法對各類人體運動狀態進行深度分析，再連接手機應用程式實時監察身體狀況，將數據同步到電腦雲端，同醫院病人健康記錄數據系統連接，隨時監察人嘅身體健康狀況。
李曉婷希望發明日後可以應用喺推動醫療同復健系統，又期望畢業嘅時候有機會申請政府資助開設公司，發展產品推出市場，畀病人、殘障人士使用。
卓妮