政情：陳健波新年祈願 早日通關疫症清零
新一年、新希望，通常許願有3次機會，而議員陳健波（波哥）話自己只需要一個願望，就係人人身體健康，之後早日恢復通關。波哥又話攬炒派會引致百業蕭條，相信隨着社會恢復平靜，可以為經濟復甦打好基礎。
指攬炒引致百業蕭條
迎接2021年，波哥早前喺社交網站發布影片，講到疫情不知不覺持續一年，至今都未有平息嘅迹象，令香港人食唔安、坐唔落，好多人更深陷人生最艱難嘅日子。所以波哥話今年一個願望就夠，希望人人身體健康，之後恢復通關。波哥對新一年充滿希望，話香港將有疫苗供應，相信加埋滴水不漏嘅入境隔離政策同檢疫措施，將疫症清零絕對唔係夢，而係目標啊！
波哥又講到自《港區國安法》實施之後，好多煽動年輕人搞事嘅人，相繼被捕或者走佬，又指呢啲人宣揚攬炒嘅結果，會搞到百業蕭條，大家都受苦、冇人有着數，相信只有極少數未清醒嘅人，仍然會進行衝擊。波哥最後祝大家唔使擔驚受怕，快啲作報復式消費，令經濟恢復增長，大家就可以快啲過好日子喇。