政情：峯鴿冇信用 被銀行Cut卡賊喊捉賊

餘額遭沒收 死撐冇大不了

峯鴿尋日喺社交網站抱怨話，佢同屋企人嘅滙豐信用卡被銀行單方面、冇通知嘅情況下取消。佢引述滙豐回應話係商業決定，若然信用卡內有卡數欠款，將從銀行戶口中扣除；若然有結餘，則未必能退回款項，並要求許稍後再致電銀行，再睇吓點處理。

另外，峯鴿又話佢同屋企人幾十年嚟嘅信貸紀錄良好，連同家人嘅信用卡戶口在內，結餘款項約有數萬元。但佢又話取消信用卡冇乜大不了，因為喺全世界仍有其他銀行可申請，批評滙豐非法侵吞其私有財產，行為猶如強盜，認為滙豐自行作政治決定，目的係協助政權打壓反對聲音，批評做法毫無法律基礎。許又要求滙豐公開交代事件，並要求監管機構作出調查，否則將考慮其他國際上嘅跟進行動。但滙豐方面就回應話唔評論相關帳戶事宜，叫佢向執法機構查詢情況。

張國鈞：被通緝仲攞信用卡？

雖然峯鴿已經唔係議員，但佢過去喺議會嘅一眾前同事，都即刻喺社交平台發文回應事件喎。議員張國鈞（Horace）話峯鴿着草畀人通緝，反問冇信用仲攞乜嘢信用卡？Horace仲揶揄峯鴿，話信用唔係人人都有o架，將來佢唔還錢而被銀行追數嘅話，恐怕峯鴿又話政治迫害。

而另一位議員何俊賢話睇完笑咗，話着草帶現金係常識；清埋信用卡尾數係常識；峯鴿戶口本身被凍結，就算滙豐畀番個戶口峯鴿都唔郁得，覺得峯鴿發文旨在刷存在感，同埋搵眾籌咁話喎。

雖然一眾議員炮轟峯鴿，但民主黨（白鴿黨）就對已退黨嘅峯鴿仍不離不棄。白鴿黨回應指滙豐凍結峯鴿及其家人戶口，並非經法庭命令或法律要求而作出，同時冇作出合理解釋。而滙豐單方面取消峯鴿一家嘅信用卡，同銀行正常營運有極大分別，而帳戶因退款嘅盈餘屬私人財產，滙豐必須立即退還。

究竟銀行係咪有問題就係未知之數，但許早前話因公務外遊前往丹麥，及後突然宣布流亡海外就係事實，都難免有人覺得峯鴿唔講信用囉。