政情：海關MV曝光 海陸空精銳盡出
海關人員平日要面對走私販毒分子，執法工作十分危險艱辛，近日就拍攝自家製MV（音樂短片）《使命》，希望令公眾多啲了解部門嘅工作，作曲作詞以至演唱，全部由海關人員一手包辦，仲將部門喺海陸空採取嘅機密行動曝光。
高科技追蹤目標
拍攝由訓練開始，現時有7,600名人員全部都需要通過艱辛嘅體能訓練，而海關人員亦需持槍執法，喺絕密練靶場進行射擊訓練，眼光相當準繩。而喺短片中亦見到神秘嘅控制指揮中心，海關人員透過情報分析，利用高科技追蹤目標車輛，並以前後包抄方式將用作走私嘅車輛截停，並將疑犯拘捕，提升執法成效，正如歌詞所言，「看透曲折案情，沉着應戰走出困境。」
至於海上走私分子，海關雷達指揮控制中心亦大派用場，海關人員利用雷達偵緝可疑船隻，又派員監視，及利用多艘快艇追蹤走私船隻，絕對是幕幕驚心。有時海關亦需借用飛行服務隊嘅直升機從高空監視目標船隻，絕對係海陸空精銳盡出。歌詞中亦有謂：海關人員「穿梭幻變風雲，一生憑勇敢，守關盡我本分」。