政情：捐人工未息民憤 葉劉叫高官減薪

應減開支 為公營機構作榜樣

其實喺問責官員捐薪酬之前，葉劉已經建議問責官員帶頭減薪。新民黨尋日會見政務司司長張建宗時提交咗十七項建議，亦都提出咗同一要求，仲話係為所有公營機構，包括港鐵、金融管理局、香港交易所、貿易發展局、生產力促進局同機場管理局等嘅管理層，樹立良好榜樣。喺公營機構方面，該黨認為應全面縮減開支預算、預留財政資源，用作抵銷調低各項服務費用，減輕市民同商界嘅負擔。

該黨又直指港鐵等機構實質上屬於公用事業，個別嘅管理層竟年薪達數百萬港元，揮霍公帑嘅風氣為公眾詬病，喺呢個抗疫嘅時刻，啲管理層更應該減薪，顯示同市民共度時艱。

實際上，特首同班問責官員、政治助理等共四十四人，喺上個月捐出一個月嘅人工畀慈善機構，款額已逾千萬元，而行政會議成員隨之亦捐出一個月薪酬，都有近七百萬元，係捐畀志願機構，共逾一千七百萬元，呢個舉動係話要顯示與市民同心抗疫，共度時艱。

上月捐薪 7成受訪者唔收貨

但有民間團體隨後公布嘅民調結果顯示，百分之七十嘅受訪者認為問責官員捐薪酬畀慈善團體，誠意欠奉，應該減薪先啱，有受訪者直情話要減百分之二十，直至疫情完結為止。可見市民根本對問責官員捐薪唔收貨。

依家無論商界同市民都喺度捱緊苦，勒緊肚皮，仲未知疫情幾時結束，可以脫苦海，而政府就話會加碼推出第二輪嘅抗疫支援，咁葉劉又再舊事重提，班問責局長係咪會考慮葉劉同市民嘅建議，主動帶頭減薪呢？抑或繼續想保住自己荷包呢？

其實特首嘅人工每年五百二十一萬元，已被外界炮轟自肥，尸位素餐，減薪係咪令佢損失好大呢？班問責高官係咪真係同市民共度時艱，就睇佢哋點做嘞！