鮑家耀重新出發 誓破降班宿命 證明自己

「講真，都幾大壓力」

「當時班費及實力有限，甚至連外援都冇錢畀，好多都係免費嚟踢，同其他球隊差好遠，上半季一直都冇試過贏波，要次循環先贏到黃大仙。」鮑家耀在2013/14年球季首次擔任主教練，帶領和富大埔成功升上超聯，可惜翌季卻慘成「升降機」。原本「鮑Sir」意興闌珊地回到車路士足球學校（香港），然而冥冥之中自有主宰，之後竟與愉園合作，順利由丙組衝上超聯。由於岑國培（岑Sir）選擇退任助教，「鮑Sir」再有機會一嘗執教超聯球隊滋味，惟之前在和富大埔的不愉快經歷，卻一度令他有所卻步：「自己都考慮咗一排，覺得自己唔夠能力，始終第一年帶隊就降班，加上愉園又係後生仔波，好驚會重蹈覆轍，講真都幾大壓力。」

「鮑Sir」主教練生涯剛踏入第3季，嚴格上仍屬初哥，惟愉園今季多達31名註冊球員，相對之前執教青年軍，抑或舊球會和富大埔都截然不同，他亦坦言尚有很大進步空間：「第1次有咁多球員，要學識帶住佢哋訓練，另外自己亦要顧及更多人嘅感受，唔可以淨係專注喺個別球員身上，有時講完唔聽都無辦法。」

與球員達成落場共識

「正式開季基本上就只可以用16、17個球員，陣容冇可能成日變，始終部分球員實力有差距，加上要時間去適應，好難令球隊持續有好表現。」愉園上季復賽重用年輕球員，但今季上陣機會明顯減少，如何在成績和培育小將之間取得平衡，對「鮑Sir」來說亦是一大難題，惟他表示早已與球員達成共識：「由於復賽後唔計成績，佢哋先有多啲機會上陣，不過當時都提醒咗球員，要把握機會爭取表現，去證明自己有能力立足超聯。」

同時，「鮑Sir」又指陣中年輕球員大多數都欠缺經驗，能獲參與超聯已屬幸運：「好多『02仔』，好似Henry（莫漢睿）咁都係啱啱先升上嚟，已經即刻有得踢，但其實仲有好多嘢需要改進，一旦去到重要賽事，又點樣擺佢哋落場？」