政情：公僕試用期內 示威被捕 聶德權補鑊 未判先炒

根據政府文件，截至本年二月底為止，因涉及參與反修例非法公眾活動被捕，接受調查或被起訴嘅公務員就有四十三人。至今年七月，政府先開始「補鑊」，計劃為公務員引入宣誓或簽署聲明擁護《基本法》同埋效忠香港特區。公務員事務局局長聶德權當時話，宣誓或簽署文件將會係新入職公務員嘅入職要求之一，同時屬於現職公務員升職或轉職嘅條件。聶仲話如果現職公務員拒絕宣誓，佢都好想知點解，所以會先了解原因，並視乎個別情況跟進。

公務員事務局早幾日再度「補鑊」，致函各政府部門主管，話如果試用期嘅公務員因參與非法公眾活動被捕並遭檢控，無論審訊結果如何，都應該立即解僱，仲強調公務員喺試用期間嘅表現同操守係其中一項考評標準。

指需觀察網上言論是否合宜

特首林鄭月娥尋日都「幫口」，話政府對公務員要求非常高，唔單止係工作表現，個人行為同操守都相當重要，政府有「大條道理」唔再聘用相關公務員，但就強調唔係未審先判。政府當局仲話，《港區國安法》第六條列明，所有公職人員包括公務員都必須擁護《基本法》同埋效忠特區。又指政府作為僱主針對試用期嘅公務員，需觀察包括其網上言論在內嘅各方面表現是否符合要求。

工會斥或令年輕人不敢加入

但公務員就似乎接受唔到政府嘅講法喇。公務員工會聯合會總幹事梁籌庭話，對公務員事務局嘅新措施感到難以理解，表明工會冇可能欣然接受。梁又話政府喺公務員未定罪嘅情況下解僱員工，難以令人「心甘命抵」，反而質疑政府嘅做法會令年輕人唔敢加入政府。佢舉例話部分公務員唔支持凍薪，反問公務員不滿薪酬而上街集會，會唔會被視為「非法公眾活動」及「搞對抗」囉。