中環出更：東方踢爆街市養鼠為患 柯創盛斥領展衞生工作做樣
本報早前踢爆秀茂坪街市養「鼠」為患，甚至淪為「老鼠樂園」。身兼觀塘區議員嘅議員柯創盛（柯仔）尋日喺社交平台上載影片，佢曾到秀茂坪街市視察衞生情況，批評領展對街市環境衞生工作過於表面化，仲鬧爆食物環境衞生署滅鼠無能。
促引新科技 設滅鼠熱線
影片中可見，柯仔嘅團隊同食環署職員到街市視察，發現唔少衞生黑點，仲話領展喺街市環境衞生方面仲有好多改善空間。柯仔回覆我哋查詢嘅時候，批評食環署冇持續、實際咁滅鼠，成日都靠本報出咗相關報道之後，先好似畀人打醒咁派員到現場視察。佢又話食環署到依家仲用捕鼠器捉老鼠，批評效率太低。佢建議政府引入新科技滅鼠，同埋設立滅鼠熱線等市民可以監察鼠患。
柯仔唔單止話食環署滅鼠無能，仲話領展對街市嘅環境衞生工作過於表面化，認為領展要負責到底，否則遲啲鼠患問題引起傳染病，或者街市嘅食物安全再出現問題，食環署同領展都責無旁貸呀！
卓妮