中環出更：英公投脫歐 議員論得失

Felix話，佢個女喺英國留學，每年學費要一萬五千英鎊，連同生活費就要三萬英鎊，佢一向都有買開英鎊交學費。佢估計，如果英國成功脫歐，英鎊會跌價，專家估計會跌兩成。雖然脫歐會令學費平咗，但佢都係支持留歐。做服裝生意嘅Felix就解釋︰「依家啲貨去到英國，已經係去到歐洲，佢哋自己分發，如果脫歐，英國唔屬於歐洲，可能要畀重稅。」

會計界議員梁繼昌就坦言，佢個女都喺英國讀書，如果英國脫歐成功，學費負擔會減輕，估計最多可以慳一成至一成半。但佢就覺得脫歐嘅機會好細，因為英國人會考慮脫歐對英國國力、外交、經濟等影響。雖然英國依家處於歐盟，但仍有好大自由度，好多方面都未必跟隨歐盟做法。

梁繼昌預計英國脫歐，留學英國嘅女兒學費可以慳一成至一成半。

梁美芬認為英國脫歐會令香港有損失。

大舊反財團包拗頸

議員梁美芬就話，佢個細仔就嚟讀大學，都揀緊去美國定歐洲。佢認為，唔少香港人對英國有情意結，而英國就為港人打開歐洲之門，如果英國脫歐，香港會有損失。至於大舊就貫徹包拗頸作風，本來佢認為英國嘅事應該由英國人自己解決，佢冇意見，但近日見到唔少大財團表態反對脫歐，財團反對嘅必定對勞工有利，所以佢會支持脫歐。

卓妮