中環出更：疫境也有商機 安宇昭籲創業者冷靜再出發
香港肺炎疫情反覆，重創經濟，特別對中小企帶嚟嚴重打擊。疫情持續或者會成為新常態，有創業家日前出席半島青年商會一個網上論壇，寄語一眾同行面對疫情要冷靜部署，把握疫情下嘅商機，準備再次出發。
創業已經二十年嘅科技公司創辦人安宇昭（Andy）同樣受疫情打擊，佢喺創業路上面對過好多風浪，包括金融風暴、沙士疫情、金融海嘯等。佢喺半島青年商會舉辦嘅「疫」流而上創新機會講座上提到，大家要將目光放遠啲，唔單止諗呢一年發生嘅事，要諗十年二十年，作更長遠嘅生意部署。Andy話疫情亦有機遇，例如可以「趁低吸納」招聘專才，或者可以趁租金大跌搵好租盤。
陳玉桂：深圳企業已領先香港
市場策劃公司創辦人陳玉桂話依家嘅營商環境困難，但認為一眾中小企絕對有機會乘浪而起，而公司好需要靠團隊合作同互信走出谷底。陳玉桂話自我增值好重要，除咗可以報讀課程，仲可以參考內地企業嘅營運方式，佢話香港唔再係龍頭，事實上好多深圳企業已經領先香港，認為大家要虛心學習。
好多人都會諗今年發生嘅事可唔可以從頭嚟過，活動籌委會主席李穎聰（Erik）都有同樣諗法，佢話自己一開始都輕視疫情，但慢慢發現經濟影響愈加明顯，特別對中小企影響好大，佢寄語一眾創業者既然唔可以改變已經發生嘅事，就應該改變心態迎接未來，例如可透過數碼轉型裝備自己，希望大家可以逆境自強再逆流而上。
卓妮