政情：內會狂煲無米粥 9鐘主席未選出

22名民主派及1名建制派被提名

內會尋日朝早召開特別會議選舉正副主席，會議開始冇幾耐後，由於現任主席李慧琼獲提名連任，就由副主席郭榮鏗主持會議。其後泛民多次就唔同事件提出討論同質疑，包括郭係咪有權決定午飯時間，政府到立法會公布施政報告時，警方入議會嘅安排係點樣等等。拗拗吓，就連建制派都忍唔住加把口，好似李慧琼質疑係咪可以喺提名候選人期間，討論發表施政報告嘅保安安排，定係應該喺辯論環節再討論。

喺中午前僅完成提名程序，共有二十二名民主派同一名建制派，即李慧琼獲提名為主席候選人，公民黨陳淑莊和議多名候選人嘅提名，其黨友楊岳橋曾提名包括廖長江等多名建制派人士，而廖拒絕提名時，誤稱楊岳橋為「陳岳橋」。

梁志祥指泛民做媒 被逐離場

到咗下午嘅會議，梁志祥質疑民主派提名咁多個候選人嘅做法，指財委會選主席時亦有二十多名候選人，但唔少人最終僅得零票，連自己都唔投自己票，質疑部分人係「做媒」。

人民力量陳志全問及梁所指「做媒」嘅意思，公民黨郭家麒認為猜疑議員動機嘅言論需要收回，要求梁向陳及其他議員道歉。民主黨涂謹申亦表明，自己若喺財委會趕得切返嚟，會投自己一票，表明自己係資深議員，有資格做主席，感到被冒犯。

郭榮鏗翻看錄影後，裁定梁志祥的言論超出公正評論，要求梁收回，梁就話自己所指係有策略地選舉，若其他議員覺得「做媒」貶意係其感覺，自己唔會收回，梁因而被逐出會議室。多名建制派都因為梁被趕，而表明唔同意裁決，或要求郭裁決要對民主派有同一標準。

其後范國威發言時提到建制派人多蝦人少，內會要有秩序地處理優次緩急，如要求政府回應五大訴求，就係符合市民嘅期望，議員應該可以喺議會透過發言解決政治問題。結果就引起民建聯蔣麗芸（Ann）不滿，大鬧范國威死不要面，「你話外面咁多人流血，咁多人流血又唔見你流血？咁多人畀人拉，又唔見你畀人拉？」阿Ann大鬧范仲未識後悔，幾多細路因其慫恿而被拉去坐監，認為范厚面皮、厚顏無恥，叫佢收聲。

內會由朝早九點拗到近五點半，就連選舉論壇方式點決定，用咗咁多時間都仲未決定到，最終更提早完會。