政情：懸空多時 黎志華接掌地署
地政總署早前突然出現人事變動，該署前署長陳松青被調至食物及衞生局衞生科出任「主任（衞生）特別職務」，導致署長職位懸空。政府尋日宣布，財經事務及庫務局副秘書長（庫務）黎志華喺八月五日起，出任地政總署署長。
近來發生唔少僭建同埋涉霸佔官地嘅案件，議員、區議員同埋警務人員都有份，而陳松青早前派人調查警務人員涉違規居住牌照屋時，突然被調職至食衞局，其後政府就解畫話係正常調動，仲早已安排，同調查事件無關喎。
鄭鍾偉任行政署長
無論關唔關事都好啦，事實上署長一席仍然係懸空，睇番簡歷，黎志華過去做過創新科技署副署長同環境保護署副署長，唔知到時黎志華應唔應付到咁多案件呢。另外，政府亦公布食物及衞生局副秘書長（食物）鄭鍾偉，將會喺下月二十日起出任行政署長。鄭鍾偉曾經做過教育統籌局首席助理秘書長，同埋政制及內地事務局副秘書長，到底佢又勝唔勝任到呢，咁就要拭目以待喇！