政情：懶設公共化寶區 部門鬥卸：唔關我事
好多時政府部門都會被批評係人肉錄音機，尋日東區區議員梁詠詩（Jenny）就鬧爆政府啲回應敷衍了事，直斥「完美體現了各部門自掃門前雪」，仲嬲到一連發兩個貼文嚟鬧，到底係邊個部門呢？
話說Jenny早前見區內街坊每逢初一、十五都會拜神化寶，但眼見區內冇公共化寶爐同劃一嘅公共化寶位置，搞到啲祭品灰燼成日滿天飛，仲有熏黑橋底嘅情況出現，所以佢就圖文並茂咁寫信去區議會嘅環境綠化及街道管理工作小組，建議路政署等部門劃番個永久化寶區畀街坊拜祭。
回應一句起兩句止
點知東區地政處回覆Jenny時，就話劃區畀街坊化寶唔關地政總署事，唔係佢哋工作範疇之內；而路政署就話涉事被熏黑嘅橋底，署方只負責其結構維修。兩個政府部門嘅回應都搞到Jenny嬲到震，喺Facebook一連出兩個貼文鬧爆，首先講番喺會上提問但換來一片沉默，其後仲話係自己蠢，先會畀心機寫信，但換來對方Hea覆。
睇番政府回應，啲部門真係得一句起兩句止，都好難怪Jenny會咁嬲嘅，睇嚟真係要反省吓喇！