中環出更：修歧視例 哺乳媽受騷擾冇保障
本港對於餵哺母乳嘅環境不太友善，甚至出現歧視問題，至二○一八年政府先至基於餵哺母乳嘅歧視提出法例修訂，立法會尋日進入《二○一八年歧視法例（雜項修訂）條例草案》嘅二讀辯論環節，有議員批評修訂條例進程過慢，亦有議員指對條例唔涵蓋騷擾哺乳媽媽感到失望。
亦未完善規限私人地方設施
議員葛珮帆表明支持條例修訂，惟條例無法保障因餵哺母乳而被騷擾嘅母親，又無法保障諸如針對私人地方偷拍裙底嘅罪行，對此感到遺憾，期望政府可以盡快修補有關法例空白。葛認為，儘管現在法例得以修改，惟商場、私人商業場所、辦公室等地方，對於餵哺母乳嘅設施並不完備，直斥發展迅速嘅香港，涉及保障女性免遭歧視嘅法例就跟唔上本港社會嘅發達程度，重申希望政府重視婦女政策。
議員梁美芬則強調，除咗法例保障外，教育同推廣係不可分割嘅環節，呢個亦係對尊重同保障女性非常重要嘅部分。至於議員陳志全則指，有關條例嘅修訂本應做得更多更快，又認為條例自二○一八年首讀至今先至進入二讀辯論環節，認為係「拖太耐」。
卓妮