中環出更：留家避疫 黃偉鴻自學掌刀劈磚
習武之人，都希望練得無堅不摧嘅好身手。品牌發展局副主席黃偉鴻早前喺Facebook上載一條視頻，可見佢跪喺地面架起磚塊並蓋上毛巾，做咗幾下預備動作之後就一掌劈下，磚塊即刻一分為二！呢種化掌為刀嘅武功，到底黃偉鴻係如何練得嘅呢？
黃偉鴻話自己並無跟隨師傅習武，因禁聚令一再延長，為免浪費餘閒於是就探索徒手劈磚嘅竅門。除上網睇錄影參看武術招式，又嘗試結合西方科學理論並親自驗證。佢話一開始就繃緊肌肉用力擊打，好難劈開磚塊，反而動作初段放鬆筋骨，直至手掌接近磚塊嘅瞬間先至發力，就有較大機會劈斷磚塊。佢話劈磚過程能一氣呵成的話，手掌嘅痛感極之輕微，但若果劈磚失敗就要承受反作用力，手掌會相當痛。雖然佢喺視頻上一招就劈斷磚塊，其實鏡頭之前就已經劈咗五、六次而不果，但幸好未去到要睇跌打嘅地步。
鄭家豪：講求學問 並非蠻力
前武術運動員、傑青鄭家豪，話習武之人為強化筋骨，有時係要擊打木塊或磚頭等硬物。因運動本身就涉及力學，所以劈磚唔可以憑一股蠻力，而係要將勁道集中，爆發速度一舉擊向磚頭嘅中間位置。懂得運用力度儘管可以揮掌如刀，不過手掌始終係皮肉構造，受傷嘅風險不能忽視，有意挑戰磚頭硬度雖勇氣可嘉，練習嘅時候需加倍小心。
善德基金會永遠名譽會長施振忠，其日常活動亦因疫情而有所調整。譬如過往喺維園散步，近來就改為穿梭港島區嘅街道，範圍擴大咗之餘，亦堅持每日必須行夠二萬步。計算步數方面手機雖可代勞，不過佢發現超過一萬步之後，往後累積嘅步數會快咗，於是佢打趣咁話，現今嘅手機科技真係識得討人開心喎。
卓妮