政情：開會睇股市 陳健波幫立法會投資？
每逢星期三立法會大會，議員都需要喺會議廳內坐定定。唔知係咪尋日嘅特首答問大會太悶，好多議員喺會議上都係咁撳電話，其中立法會保險界議員陳健波（波哥）仲喺度睇股市添！
副局政助知衰 答問會齊蒲頭
波哥接受查詢時就話當時其他議員質詢緊冇嘢做，加上見到唔少人撳電話，所以先撳埋一份。佢仲透露，自己一向有睇開股票嘅習慣，同金融服務界張華峰一齊有份幫立法會做投資，而且覺得最近個市比較敏感，所以緊張啲。咁講，係咪即係話佢幫立法會𥄫住個市呢？佢仲建議大家應該要學識睇股市，而佢仲喺囝囝細個時已經教佢買，而囝囝嘅成績都唔錯。
另外，前排班副局長同政助接連發生甩轆事件，早前有立法會議員仲點名投訴部分政助唔蒲頭添！而喺過往嘅特首答問會，都只有小部分副局長同政助出席旁聽，而喺今日嘅答問會中，幾乎個個局嘅副局長同政助都出席兼坐定定。唔知係咪畀議員鬧得多，所以知衰即刻露面呢？