政情：查峯鴿撞正開財會 麥美娟張宇人兩邊走

係就係響表決鐘，但唔係表決撥款申請，而係表決由議員朱凱廸要求傳召海洋公園嘅債權人出席會議嘅動議，當時就見到麥美娟、謝偉俊、謝偉銓、張國鈞同張宇人急急腳由二樓會議室跑出，直奔𨋢口入𨋢落一樓，大約兩至三分鐘後，又見到佢哋上番嚟，又狂奔入二樓會議室，開財委會。

跑嚟跑去做乜？趕住去邊？原來譴責民主黨（白鴿黨）議員許智峯（峯鴿）議案成立嘅調查委員會喺五點鐘開會，撞晒時間呀！佢哋係委員會成員，而麥美娟仲係委員會主席添！

夠法定人數免流會

事後問番麥美娟，話佢哋幾位議員趁住財委會響鐘五分鐘嘅投票時間，趕住落去一樓點名開會，好彩最後都夠法定人數開會，唔係過咗十五分鐘就會流會。

麥美娟形容調查委員會進度大致良好，希望呢屆會期結束前可以提交報告畀大會，但細節就唔方便透露咁多喇！