政情：問責官民望齊跳崖 鄭若驊再墊司底

香港研究協會喺五月十一至十八日，成功訪問逾一千名十八歲或以上嘅市民，受訪者就特首，司局長表現嘅滿意度進行評分，一分為非常不滿意、三分為一般，五分為非常滿意。調查結果，特首同三司嘅評分都低過兩分，十三名局長嘅評分均不足三分，顯示問責團隊嘅表現唔合格。

調查結果又發現，林鄭嘅評分較上次調查下跌零點一四分，跌至一點六一分；政務司司長張建宗亦下跌零點一五分，只有一點六九分，而財政司司長陳茂波嘅評分跌幅最大，下跌零點一八分至一點八分，而鄭若驊則繼續「墊司底」，而評分再跌，顯示愈嚟愈多受訪者唔滿意佢嘅表現。

匿埋寫網誌 齋做鍵盤戰士

梗係喇，鄭若驊上任後一直醜聞纏身，又唔做好呢份工。點解咁講？事關佢份工嘅職責，其中一項係要解釋法律條文，但每次有新嘅計劃甚至係政制，都唔親身出嚟解釋，反而匿埋寫網誌回應具爭議嘅事件，佢龜縮做鍵盤戰士，難怪被嘲為「避政司司長」。其實，外界不斷有強烈聲音，要求佢快啲辭職，唔好阻住地球轉，而政府喺上月底大換班，亦有議員批評佢能力有問題，對外解說工作不足，質疑點解無換走佢。究竟係政府高層死攬唔炒佢，抑或係佢賴死唔走？

捲試題風波 楊潤雄亦包尾

唔單止鄭若驊嘅表現差，查實整個問責團隊嘅表現都唔合格。民調結果顯示，十三名局長嘅評分全部喺三分以下，教育局局長楊潤雄嘅得分包尾，只有一點八八分，相信係同近期連串嘅教育風波有關，例如有小學教師歪曲鴉片戰爭嘅歷史，甚至中學文憑試歷史科出現「賣國」試題等等。至於四名新任局長中，以財經事務及庫務局局長許正宇嘅評分最高，有二點一三分，而民政事務局局長徐英偉最低分，只有兩分。