政情：年輕人仇恨社會國家 陳健波：教育出問題

波哥日前喺Facebook上載咗一條片，講到話好多人都覺得依家年輕人嘅思維、邏輯同核心價值同上一代人好唔同，佢哋以自己為中心，自己權益最大，意見唔同嘅就係敵人，自己冇嘅嘢，其他人都唔可以有，對社會同國家充滿仇恨，覺得自己被制度欺壓，完全唔識妥協，達唔到目的就攬炒，破壞一切咁話。

叫葉建源籲老師自律

波哥仲話，大家應該知道呢一切都係因為教育制度出咗問題，由幼稚園、小學到中學，由功課到考試都有混淆是非，仇警仇國家，甚至竄改歷史嘅嘢，嚴重程度令人震驚，只可以明目張膽、無法無天嚟形容，佢話喺立法會講過，唔會因為有部分老師教壞學生就話全部老師都係黑老師，但就要求葉建源勸喻老師要自律，仲提醒家長，自己仔女自己救，要小心留意仔女課本同教材。