政情：港府廢APP無人吼 資科辦捱轟出醜

投資署APP耗38萬 僅千餘次下載

查實政府多「廢APP」都唔係依家先有嘅事，資科辦喺二○一八年十一月曾發布經修訂嘅《流動應用程式實務指南》，當中訂明各局或部門應檢討，係咪應該將推出多時但累計下載次數仍少於一萬次嘅APP下架。不過，政府資訊科技總監林偉喬日前答覆特別財會時透露，政府喺過去兩個財政年度曾推出七個APP，截至二月底有四個APP嘅總下載次數唔夠一萬次。

其中，最誇張嘅要數由投資推廣署推出、名為「投資推廣署新聞及活動」嘅應用程式，呢個APP喺一八年九月推出，但上架後嘅總下載次數只有一千一百次，最終喺翌年四月急急下架。不過，呢個上咗架只有短短八個月嘅APP，就使咗署方三十八萬八千港元嘅開發費用，仲未計日常維護開支亦使咗二萬四千元。

香港資訊科技商會榮譽會長方保僑（Francis）就話，好多政府APP都冇開發嘅必要性，形容整網站反而又平又方便，唔需要為唔同手機推出唔同版本，可以慳番用喺維護程式嘅公帑。佢又質疑，好多政府APP冇特別功能，或者內容有時限性，當初根本唔應該搞。Francis又話，好多部門搞IT嘢前都唔一定要經資科辦，批評政府部門間嘅溝通好差，冇特定部門負責統籌，同畀實質、有用嘅意見。

葛珮帆斥人做我做心態 忽視推廣

資訊科技及廣播事務委員會副主席葛珮帆（EQ）就講到，其實以前仲多「廢APP」，委員會多次討論呢個問題後，依家數量已經少咗。佢批評政府部門整APP時好多時抱住「人做我做」嘅心態，但又唔做好計劃同推廣，搞到APP嘅下載同使用率都好低。EQ又形容資科辦嘅角色好似政府內部嘅顧問，其他部門唔去諮詢，佢哋就唔會知外面發生咩事。佢同時建議資科辦應主動畀意見其他部門，推動佢哋善用科技，唔好等佢哋閉門造車咁話喎。