中環出更：高錕作畫畫出「啟示」

高太尋日代表高錕出席一個「書迷」比賽頒獎禮，提到丈夫近況，雖然已經冇能力重新閱讀，但一樣可以執起畫筆做「畫家」。高太憶述，高錕去年初次執筆，由於腦退化症患者一般缺乏耐性同集中力，對距離同空間等抽象思維嘅認知都有困難，所以起初連畫紙都掂唔到，只係畫空氣。幸得高太同導師不斷從旁鼓勵，高錕先可以慢慢重拾信心，更喺年初完成首幅畫作。

高太藉此勉勵年輕人閱讀

高錕嘅導師Polly將其畫作命名為「啟示」，透露高錕透過鮮艷奪目嘅顏色勾畫出一個花籃，反映佢思想上嘅改變，由起初嘅迷惘、好怕接觸畫布，到識得手執畫筆喺畫布上自由自在咁畫畫，係好大嘅進步。高太亦藉先生嘅「大躍進」，鼓勵年輕人要愛上閱讀都唔係咁難。

高錕在患上腦退化症後成功完成畫作，並命名為「啟示」。

高錕（右）近年因患上腦退化症已經深居簡出，幸得太太黃美芸（左）一直體貼照顧。（資料圖片）

馬逢國：書本可「安撫入睡」

講起閱讀，同場嘅立法會議員馬逢國及葉建源都另有一番體會，馬逢國笑言，書本過去一直充當「安撫入睡」嘅角色，但慨嘆自從當選議員後，睇書時間少之又少，要「偷取」搭飛機嘅時間先可以睇返一、兩本書。葉建源就話自己細個淨係鍾意睇「公仔書」，直至小學四年級因意外入院，醫生贈佢兩本翻譯小說，先開展佢嘅閱讀生涯。

卓妮