政情：飲用得宜 唐卓敏：酒可治身心
喺正統療法以外，民間總會流傳一啲祛病偏方，譬如早前有傳言指，飲用烈酒能殺滅入侵咽喉一帶嘅病毒。身為醫生嘅收藏家協會前會長唐卓敏，就對呢種講法不置可否，佢話若因烈酒所含酒精度高，就可對付體內病毒的話，咁點解唔索性飲乙醇呢？不過佢相信冇人會飲乙醇囉。
二鍋頭解食醉蟹不適
雖然烈酒消滅體內病毒嘅講法唔可以當真，不過杯中物喺醫療上又未必全無價值。佢話愛爾蘭嘅住院病人，往往因病房環境同屋企截然不同而徹夜難眠，而醫院嘅應對方法，就係畀病人一罐黑啤酒。因為黑啤酒係愛爾蘭人嘅家常飲品，飲用之後可稍緩對病房嘅陌生感覺，就會較易入睡。而英國人又會喺暖和嘅威士忌酒加一片檸檬，以紓緩傷風感冒。佢話自己都試過喺上海食醉蟹後感到腸胃不適，結果一杯二鍋頭落肚，就即刻舒服晒。可見飲用得宜，酒對身體都有好處o架，當然前提係唔好過量喇。