中環出更：攤檔變靚 涵蓋衣食住行 吳國安細數工展會今昔
新一屆嘅工展會日前開幕，唔少市民都入場買心頭好，而香港中華廠商聯合會（廠商會）一眾高層當然傾巢而出嚟撐場喇！副會長吳國安（安哥）仲話依家嘅工展會同以前好唔同。究竟有幾大分別？
安哥話依家工展會啲攤檔比以前靚咗唔少，仲提到以前比較多啲食同玩嘅元素，但依家嘅攤檔已經變到衣食住行咩範疇都有！吳國安仲講到唔知係咪依家市民大眾都矜貴咗，近年開始注重多咗喺健康上面，所以呢幾年工展會都多咗好多同健康相關嘅食品同產品嘅公司嚟到參展。
劉子芸：細個同全家人嚟玩吓食吓
轉頭見到廠商會青年委員會（青委會）副主席劉子芸（Vanessa），佢提到細個時會同爸爸、爺爺成班屋企人嚟行工展會，但嗰時喺添馬艦搞，場地就冇依家喺維園搞嘅咁大。Vanessa諗番起細個出嚟行吓嘅機會並唔多，所以每年一度嘅工展會就係一個難得嘅機會，有得周圍玩吓食吓嘢好開心，依家每次入到工展會都會順便買啲糧油食品返屋企添！
王詩雅：以前工展小姐係港姐跳板
另青委會副主席王詩雅（Celia）就講，因為家住港島區，所以細個時每年都會入嚟工展會行吓。佢話嗰時屋企人唔會畀佢亂咁食街邊嘢，但係入到工展會就可以買嚟食，佢仲特別提到自己係好鍾意食某一個本地品牌嘅雪糕添！講到每年工展會嘅重頭戲工展小姐，Celia話以前好多女仔會用嚟做選港姐前嘅跳板，但依家出嚟選嘅通常都係參展商嘅員工。
廠商會常務會董楊志雄同林凱章、青委會副主席史昊洺、黃浩鈞同博愛總理王陳鴛鴦個仔王偉樑亦有到場。王偉樑講到細個入到嚟好鍾意周圍去啲攤檔試食，啲姐姐見到係小朋友仲會畀得大份啲，但依家大個咗就再冇咗呢支歌仔唱。佢亦都講到網絡發達咗好多，依家好多參展嘅牌子都未必有實體舖，有啲甚至只係得網店添！
卓妮