探射燈：成衣$5 飯盒$15 物價時光倒流二十年

太子花園街多間地舖劈價促銷，成衣每件五元便有交易。

薄利多銷 「蝕住賣」

「廿年前都冇見過五蚊一件衫，我依家着住嗰件都係十蚊，證明經濟真係差！」太子花園街兩旁街舖，平貨衣物湧現，有二手時裝低見每件五元，新衣十元亦有交易，正在「買平貨」的長者劉伯坦言未見過如此平價的衣服。時裝店店員Kat表示，自今年一月起已推出超低價衣服作招徠，因疫情影響生意減半，業主卻無減租，惟有薄利多銷，「新衫都要蝕住賣！」

此外，深水埗區內亦有多檔燒味飯推出抗疫價外賣飯盒，有食店專為長者提供十三元的燒肉飯，亦有食店提供十五元的單拼燒味飯。店員伍小姐指，雖然經濟變差，食店推出平價飯盒益街坊，望共度困境。

深水埗有食店推出十五元燒味外賣飯盒，光顧的多為長者。

店員Kat指推出平價衫是成本價，疫情下生意大減一半惟有減價求存。