中環出更：亂局持續 生意慘淡 陳家偉：業主減租補唔番
港鐵不但經營鐵路運輸，亦擁有好多鐵路沿線物業，一旦宣布停駛，交通同零售業務亦一併受影響。香港中華廠商聯合會常務會董陳家偉，就有專賣店位於港鐵站範圍，生意亦難免因鐵路停駛而受到波及。
陳家偉話持續嘅亂局不但令遊客卻步，就算係港人都盡量減少外出，本來屬消費日子嘅周末同周日，依家淡靜到幾乎唔使開工，以致近來嘅生意額下跌近四成，雖然業主願意同租客共度時艱，減租三成，但都未能夠彌補消失咗嘅營業額。
既然實體店銷售受時局影響，採取網購又係咪可行呢？陳家偉就話作用唔大，因為香港交通實在方便，到店舖消費既可觸摸實物，又可同店員有言語交流，即場付款馬上收貨，反觀網購就要等候安排送貨上門，所以網購對港人而言，仍未成氣候。佢又話試過有分店因港鐵站宣布停駛而提早關閉，同事收舖之後，因唔熟悉鐵路以外嘅交通運輸，喺人潮中啟用手機嘅地圖查詢路線之時，遭誤會偷影示威者，被迫令交出手機資料先可安全脫身。雖然嗰位同事「無穿無爛」，但前線員工嘅安全，佢不無顧慮。
陳裕光：屋邨分店生意反而好咗
香港市務學會榮譽主席陳裕光，佢所屬嘅餐飲集團最近亦因街頭衝突妨礙營運而發出盈警。佢話喺旅客較多、位於旺區嘅分店，業務大不如前，反而港人傾向選擇留區消費，喺屋邨嘅分店生意反而好咗。
孫大倫：港人適應力強 可渡難關
上市公司主席孫大倫就認為大國之間嘅角力，同香港今日嘅局面不無關係。佢話目前港人消費意欲薄弱，儘管打算移民嘅人多咗，連帶影證件相嘅生意都旺咗好多，但拉上補下，業務整體而言都係差咗。親歷過六七暴動嘅佢話港人身段靈活，適應力强，逆境過後元氣都可以快速恢復，若果大家同心合力，相信今次嘅難關最終都可以渡過。
卓妮