政情：大樓被破壞 鄉議局要使幾十萬維修
近期社會衝突嚴重，社區唔少設施都被人破壞，位於石門嘅鄉議局大樓亦曾經成為被破壞嘅目標。雖然大樓上周喺被破壞後都仲舉辦到活動，但尋日鄉議局執委會上就披露咗財產損毀情況，似乎都傷得唔輕喇。
鄉議局大樓管理委員會尋日報告大樓損毀情況，詳細列出月初被破壞詳情，其中大樓正門同展覽廊嘅玻璃門、地下男廁同保安監控室玻璃窗同埋幾塊防煙門玻璃都被打碎，正門牆身嘅三十二吋電視同天花閉路電視鏡頭亦被打爛，連正門嘅對聯都被拆毀。
正門用唔到 損失租約
鄉議局聯絡咗保險公司，亦搵咗承辦商跟進維修。據聞維修費達六位數字，未必能夠全數向保險公司索償。有鄉紳就話，保險公司冇當成暴動而肯受理索償，已經係不幸中嘅大幸喇。
不過，今次破壞搞到要花幾十萬元維修之餘，亦都影響咗鄉議局出租業務，因為大樓正門用唔到，出入要經停車場，所以唔少租用團體都取消租用同要求退款喇。