中環出更：鬧毛孟靜「食慣洋腸」 何君堯被逐
立法會內唔能夠用不當嘅言詞，立法會議員毛孟靜尋日喺內會批評何君堯嘅言論冒犯唔係律師嘅議員，何君堯反駁指「己不自侮，別人焉能侮之，食慣洋腸嗰啲人，佢可能自己侮辱自己，係咪呀？」頓時引起民主派議員起哄，有民主派議員斥何君堯係人渣，仲叫佢「吔屎」。
何君堯發表言論後，曾離開會議廳，主持內會嘅副主席郭榮鏗休會十分鐘，要求何君堯回來處理事件。恢復會議後，毛孟靜指自己係兩子之母，認為何嘅言論涉及性別歧視同性騷擾。民主黨林卓廷認為何極度冒犯女性，批評何係人渣。至於鄭松泰就要求何君堯解釋洋腸嘅意思。
泛民起哄 斥「人渣」「吔屎」
何君堯就反駁，質疑議員點解認為洋腸係侮辱，係咪字典中有提及，指大家平日亦會叫譚文豪做「飛機豪」，反駁係咪有字典稱洋腸具冒犯性。陳志全同鄭松泰就叫何上網搜尋，鄭更斥何「你吔屎啦」。
何君堯重申，唔認為自己嘅言論與性或種族有關，再問毛「食唔食臘腸」，又認為郭榮鏗應處理鄭叫佢「吔屎」同林稱佢為「人渣」嘅言論。
郭表明，何嘅言論極度具冒犯性及侮辱性，若唔收回，將命令佢退席。何其後拒絕收回言論而被逐出會議室。至於鄭其後認為屎有做肥料價值，「屎都唔應該畀佢食」，因而收回言論，但林卓廷就拒絕收回「人渣」嘅言論，表明認為何係「第一人渣」，為免主席難做，佢決定不回來。
卓妮