中環出更：五行強水欠金 謝偉銓改名有金字

中國人改名都好在乎意頭，甚至會搵師傅計吓，都係為小朋友圖個吉利。好似立法會議員兼香港專業及資深行政人員協會（專資會）前會長謝偉銓（Tony）早前出席專資會周年晚宴時，講起細個改名時，發現五行強水欠金，所以個名就會用咗有金字邊嘅「銓」字，不過幫自己嘅小朋友改名就冇特別算過嘞！
立法會主席梁君彥（中）近排咁忙都抽空嚟到，謝偉銓（右）同李鏡波（左）都特別開心。（陳嘉順攝）
立法會主席梁君彥（中）近排咁忙都抽空嚟到，謝偉銓（右）同李鏡波（左）都特別開心。（陳嘉順攝）

Tony話，自己仲有保存幾十年前嗰張改名嘅紅紙，強水有樣好處，就係女朋友會多啲，因為水就係女性。咁唔通佢結婚前真係有好多女朋友，Tony就笑而不語，問極都唔答卓妮。其實都唔使咁緊張嘅，Tony平日咁錫太太，謝太一定唔介意呢啲陳年舊事嘅！

至於創會會長容永祺當年改阿仔個英文名就同宗教有關，佢話自己本身係基督徒，當年想阿仔好有智慧，所以阿仔個英文名就叫Solomon，因為所羅門王係最有智慧嘅皇帝，而且聖經上話「敬畏耶和華是智慧的開端，認識至聖者便是聰明」，後來又改埋佢個中文叫容思瀚，因為思想浩瀚，不過阿仔個瀚字對小朋友而言都幾深，講笑話「寫到佢流汗呀」。

容永祺（左）當年想阿仔容思瀚（右）好有智慧，所以改中英文名都諗過度過。
  • 容永祺（左）當年想阿仔容思瀚（右）好有智慧，所以改中英文名都諗過度過。
副會長梁世民（左）、會員李芷筠（中）同中大工程學院副院長（外務）黃錦輝（右）都有出席。
  • 副會長梁世民（左）、會員李芷筠（中）同中大工程學院副院長（外務）黃錦輝（右）都有出席。

李鏡波唔易激動 好少鬧同事

轉個頭見到會長李鏡波，佢話自己係鏡字輩，所以好多兄弟個名都有個鏡字，至於點解會用個波字，就唔知點解嘞，估計可能同「波平如鏡」有關，等個人唔容易激動，自己真係好少鬧同事o架。佢當日仲帶埋女兒李璧然（Jabe）嚟添，Jabe話，自己個英文名係因為媽媽有個好靚嘅朋友叫Jabe，於是就幫佢改咗呢個名嘞！睇嚟媽媽改名真係有啲道理，依家阿女大個就咁靚女嘞！

卓妮

第一手消息請下載on.cc東網iPhone/iPad/Android/Windows Phone Apps