中環出更：青聯換莊 范駿華坐正
香港青年聯會（青聯）日前舉行周年大會，常務副主席范駿華將於七月正式接棒成為新主席，現任主席霍啟剛則會功成身退。至於副主席吳傑莊及副司庫霍啟山就齊齊升呢，前者變成常務副主席，後者升任常務副秘書長。不過，今年最矚目相信係新鴻基地產執行董事郭基煇及觀瀾湖集團副主席朱鼎耀由顧問團進身會董會副主席，意味會落手落腳搞青年工作。
至於秘書長顏明潤及司庫蔡德昇亦會同時進身副主席行列。卓妮見唔少家長本月都忙於督促子女加緊溫功課，甚至要放「侍考假」化身書僮陪子女一起應付考試，但有兩個囝囝嘅顏明潤就非常自在。
顏明潤鼓勵兒按興趣發展
原來顏明潤從來都唔鍾意強迫小朋友，而係鼓勵囝囝搵自己嘅興趣自由發展，唔希望因為督促小朋友讀書搞到親子關係變差，加上返學壓力咁大，放假應該去玩輕鬆吓。
不過，顧問黃英豪嘅做法就剛剛相反，佢話由細到大都訓練子女溫書要專注，包括一定要熄晒啲手提電話，因為呢個年代實在太多誘惑同干擾，溫溫吓書又Whatsapp，所以佢幾個小朋友成績都唔錯，證明做法有效，個女今年仲大學畢業添。
黃夢瑩進修 搵仔女陪讀
會董李美辰就話，仔女就讀嘅學校測驗考試唔多，唔使佢太過操心；副主席黃夢瑩就笑言，係小朋友陪番佢讀書至真，事關佢不時進修，有仔女在旁一同努力特別有學習氣氛。
卓妮