中環出更：總選舉事務主任懸空已久 黃文超署任
選舉事務處今年四月被揭隱瞞遺失選民登記冊兩年半，喺事件中說法前後不一嘅時任總選舉事務主任黃思文，早前被調任薪諮會聯合秘書處助理秘書長，但總選舉事務主任呢個職位一直懸空，唔知由邊個接任，原來上星期憲報已經公布，由原本兼任住先嘅首席行政主任黃文超正式接任，不過，依家都仲係署理住先，未升正嘅。
據知，黃文超喺爆出失冊事件時，都未升正首席行政主任，當時只係署理緊首席選舉事務主任一職，但黃思文因為失冊事件，被急急調走，工作都總要有人做，於是就叫黃文超要兼任埋總選舉事務主任。
唔知係咪因為選舉事務處近年爆出失冊事件之餘，又爆出遺失載有選民資料嘅手提電腦事件，大家都唔係好想接任做總選舉事務主任呢個位呢？邊個正式接任做總選舉事務主任，政府一直遲遲未有公布，一直都只係寫懸空。
近日升做首席行政主任
不過，黃文超近日升正做首席行政主任，政府喺上星期就隨即委任咗佢做總選舉事務主任，職級係署理高級首席行政主任。睇嚟都係見佢橫掂做開選舉，不如繼續做落去嘞！
卓妮