中環出更：慢必申報收受十萬元秘捐

早前泛民主派多名立法會議員被踢爆收受壹傳媒集團前主席黎智英嘅秘密捐款，但廉政公署調查至今仍未有進一步行動。卓妮近日翻查立法會議員向秘書處提交嘅利益申報，發現人民力量陳志全（慢必）今年四月亦都收咗一筆十萬元嘅神秘捐款，但係佢就講到明因為捐贈者唔想公開名字，認真神秘。

雖然慢必唔肯公開呢位捐贈者嘅身份，但佢就透露對方係人力主席袁彌明丈夫林雨陽嘅朋友，因為見到佢大半年前搞咗個「大愛糧品」實驗計劃，向貧窮長者派飯盒、生果同日用品等，所以就特意捐款，仲講到明捐款要用來向各區貧窮人士派發糧食添。慢必話，之前佛誕已經用咗部分捐款派米畀長者，但佢就希望可以發揮大啲嘅作用。

慢必嘅同事諗頭多多，其中有人建議不如向長者派發啲更有營養嘅食物，例如有機菜。不過，慢必就覺得個建議「太離地」，因為有機菜較貴，「似中產嘢」，想更好運用捐贈咁話。

卓妮