政情：陳岳鵬獻出「第一次」 副局變焗長

陳岳鵬好小心咁將炒飯倒落個盆度。

親手整焗豬扒飯

陳岳鵬依家係香港賽馬會行政經理，之前就喺社交平台上載咗幾張相，同大家講佢要獻出佢嘅第一次……煮飯仔。有邊個可以令佢獻出珍貴嘅第一次？原來係佢最愛嘅焗豬扒飯。不過，佢又整得似模似樣喎，由發蛋炒飯、醃豬扒、切番茄、淋醬汁到最尾鋪芝士喺面，都跟足步驟冇馬虎亂嚟o架！最後製成品好唔好食就唔知喇，但望落同出面街賣嘅都差唔多o架！

網友對佢嘅「第一次」都幾滿意o架，有網友就笑佢由局長變咗「焗長」，又有人讚佢係住家暖男、男廚神同美男廚房添！唔知佢下次又會煮邊幾味呢？

話晒第一次煮嘢食，佢都好小心冇切到手。

陳岳鵬（中）好開心咁同朋友分享佢嘅焗豬扒飯。（互聯網圖片）