中環出更：鄭泳妮重展舞步為慈善
保良局主席鄭錦鐘千金鄭泳妮（Vene）最近為慈善苦練「舞功」，日前登台為香港芭蕾舞團籌款。由於Vene放下舞鞋多年，所以找來名師特訓五十小時，期間不慎拉傷右腳大腿，但佢敷過藥、針灸過後，又咬緊牙關踏台板。
開「無啦啦」網店有段古
活潑好動嘅Vene，六歲時曾學過三年芭蕾舞，今次重拾興趣，但好多舞步已經忘記，要速成惟有勤力啲。Vene每晚放工後就相約莊士集團執行董事莊家蕙等人齊練舞，苦練三星期，因為壓力大，體重急跌幾磅。
不過，Vene笑言瘦咗身仲開心，事關表演當晚，件舞衣好窄，肥啲都着唔落。咁搏命，爸爸鄭錦鐘同媽媽關巧妍當然要買枱撐囡囡啦！
愛跳舞嘅Vene，也有搞鬼嘅一面，近日佢開設網上禮品店「Molala」（無啦啦），原來啟發佢嘅係一位失戀朋友。話說Vene見友人失戀後悶悶不樂，一心想搵件禮物氹對方，可惜搵勻全港都無，最後決定夥拍一位外籍設計師朋友，一齊生產一件搞鬼禮物，成件事就係「無啦啦」咁開始，所以索性將「Molala」做舖頭名喎。