中環出更：許晉平愛扮粵劇人物 唱《帝女花》冇難度
早兩日保良局搞咗個慈善粵劇專場，見到「九巴金公主」伍穎梅（Winnie）孖住男友許晉平到場，原來佢哋都鍾意睇粵劇，尤其係嗰日演出嘅劇目《帝女花》，仲話嚟睇粵劇又可以做善事一舉兩得。
伍穎梅話細細個已經開始有睇粵劇，覺得佢哋嘅化妝造型同功架好吸引，有時自己喺屋企都哼吓粵曲；許晉平就話成首《帝女花》，由頭識唱到尾，兼且冇難度，仲話有時喺屋企仲同兄弟姊妹玩扮演粵劇裏面人物添！
陳黎惠蓮最拿手唱《狄青闖三關》
既然係保良局嘅活動，主席馬清楠夫婦當然有嚟撐場。問到馬清楠對粵劇有冇興趣？佢話一定有啦，好欣賞粵劇演出者嗰份熱誠，因為粵劇要用好多時間去苦練先有成績出現，正所謂台上一分鐘台下十年功，所以保良局創辦咗個「粵劇發展基金」重點係讓兒童青少年同長者有機會接觸傳統粵劇文化，至於嗰日嘅粵劇慈善演出收益係幫安老服務之用。
轉頭見到副主席陳黎惠蓮夫婦同總理顧東華夫婦。問到陳太有冇唱粵曲？佢話有，最拿手係《狄青闖三關》，鍾意啲歌詞好有意思。問佢幾時開始學唱？佢話喺○七年同奶奶一齊去學，點知一學就上癮，間中喺保良局慈善活動都會粉墨登場，仲話有時喺屋企唱，啲孫係佢嘅知音人添！
顧東華就話粵劇係國粹一定要傳承落去，讓小朋友多啲接觸，等佢哋感受到粵劇嘅精髓，問到佢表演時有乜嘢感覺？仲話感受到學粵劇唔係容易嘅事，化一個妝閒閒哋都要一、兩個鐘頭，而且頭飾都有一定重量，所以演出者嗰份熱誠值得尊重。
卓妮