政情：黃偉鴻送外賣 冇帶身份證兼唔識路

想親身試App實唔實用

點解會體驗做速遞員？Ellis解釋，係想親身試吓呢啲應用程式到底實唔實用，於是佢就喺元朗區客串做外賣速遞員，登記完揀好地區同時間，再等程式批准後，就可以接訂單，當日佢接咗三宗訂單，話因為元朗區有啲商場穿嚟穿去，而且目的地係商場上蓋嘅大廈，要花成半個鐘去搵，唔係咁識路行，好彩最尾都畀佢搵到。

被問到喺送外賣期間又有冇遇到乜嘢困難時，佢話最麻煩係唔記得帶身份證，搞到畀保安話「送外賣又冇身份證開門畀你上去咁咪好危險？」於是佢畀應用程式嘅資料同埋啲食物個保安睇，對方先放佢上去嗰個樓層。

Ellis話送外賣順便當係做吓運動，而嗰日一共賺到二百幾蚊，仲話做足全日有幾百蚊落袋都唔錯喎。