政情：呢頭撇低老婆睇靚女 樹根嗰頭走去搵「小三」
上次都講過，立法會前議員鍾樹根撇低老婆去選美會做嘉賓，攞正牌睇靚女，隔冇耐啫，佢竟然去搵「小三」。竟然咁大膽？
呢排反修例嘅衝突愈演愈烈，尤其係八月三十一日嗰晚，樹根喺社交平台貼文，話收到短訊，唔敢出街，仲話拎啲「小三」出來添！其實佢講嘅「小三」，係佢收藏嘅古董相機，仲話好彩冇發霉喎。
網友大反應叫避忌
啲網友見樹根提到「小三」隨即好大反應，叫佢改叫「小二」或「小四」好啲，叫小三鍾太會唔鍾意，但係樹根反而好得戚，話「佢（太太）經已麻木了，後宮過百！」有網友就反駁「有冇數清楚呀？唔好報細數喎」。另有網友仲話「都是避忌吓好啲，你見啲師奶一聽到：小三淘汰試就群起攻之，就知『小三』好敏感！」點知樹根直情話「咁，全部降級，做『小四』！」
受到反修例示威嘅影響，好多市民都話要避開示威人潮，有網友就話「人就發霉，個個禮拜冇街去」，樹根就叫對方「你湊孫啦！理佢鬼反！」而嗰位網友就堅持「我要真去街」。幾時可以好似以前舒舒服服咁行街？真係預計唔到。