政情：鍾嘉敏幫學生磅書包 學校阻力年年增
學生哥已經開咗學半個月，重投校園生活，過番埋首書本同功課嘅日子，相信書包重量都一定唔輕。灣仔區議員鍾嘉敏已經幫學生哥嘅書包磅重多年，唔止感受到佢哋所承受嘅重量，亦體會到學校嘅阻力，到底係咩呢？
鍾嘉敏就話，每年去量度書包重量都令到學校有壓力，最明顯就係初期獲准入到校內量度，但愈嚟愈多學校怕量度時會被辨認，而被要求去遠啲地方磅重，甚至試過有學校落閘婉拒。不過佢就認為，咁樣係反映出學校都明白書包重嘅問題，而現時都多咗學校安排儲物櫃、電子課本等以減輕學生書包重量。
仲記得學校飯盒好難食
佢又講到，學生書包重主要係因為要帶水同飯盒。佢以前返學書包好輕，為免膊頭負重會手拎住幾本書，再加上半日制，唔會有飯盒問題。佢又話，初中時會為慳錢趕返屋企食飯，高中時功課多，就被迫食學校飯盒，到依家都記得好難食，似乎好大陰影喎。