聯和墟勁違泊 警齋派牛肉乾
「啲私家車、客貨車成日泊晒喺路邊，三條行車線霸咗兩條，我見啲貨車想上、落貨都唔得！」張小姐指粉嶺聯和墟常有車輛違泊，其中以聯昌街、聯盛街、聯發街、聯興街及和泰街的情況最為嚴重，中午時段的違泊更加「墟冚」。
半年發800張告票
警方發言人證實，已知悉聯和墟一帶的違例泊車情況，並作出相應的票控行動。過去六個月，警方曾接獲多宗涉及上址一帶的車輛阻塞報告，並向違例車輛發出約八百張定額罰款告票。
「半年發八百張告票，證明呢度係違泊黑點啦，點解都淨係繼續派『牛肉乾』？一啲阻嚇力都冇！」張小姐不滿警方執法成效不彰，令上址車輛違泊情況至今仍無改善。