政情：港台偏頗 搞亂香港 陳健波促查找不足
年花十億元公帑嘅香港電台（港台）劣迹斑斑，審計報告舊年亦都批評港台收視率低、教育電視節目製作費高昂，立法會保險界議員陳健波（波哥）尋日都拍咗一條長近兩分鐘嘅短片放上社交網站Facebook鬧爆港台，話唔少市民都批評港台嘅報道內容偏頗，強烈要求港台查找不足，重回正軌，否則市民嘅不滿會愈嚟愈大，甚至要求政府將資源擺喺其他地方。
波哥喺短片提到，近期唔少市民就質疑某啲傳媒報道偏頗，例如立場長期反對中國，暗中支持港獨等，又話即使搞亂香港都在所不惜，好多人睇完呢啲傳媒報道就覺得好過分、好難接受，港台更係眾矢之的，話啲節目「側埋一邊」。
漠視禮貌秩序 發洩多過搵真相
坦言唔係專業傳媒出身嘅佢，強調報道要專業、客觀及公正就係人都知，雖然香港係自由社會，市民可以選擇唔買或者唔睇。但係港台係納稅人出錢，部分記者竟然喺出席政府或警方發布會期間，漠視應有嘅禮貌同秩序，似係發洩多過尋找真相。又話受訪者未回應就「質」定先，而港台部分節目主持人都有同樣問題。
須重回正軌 中肯中立免惹不滿
佢覺得港台立場愈嚟愈偏頗，加上港台用咁多納稅人錢，但平均收視率咁低，又話唔係要佢偏幫政府，但最少要準確持平地報道，協助大家了解政府施政嘅考慮或困難。佢又話現時有咁多電台、電視台同網台競爭，港台有需要查找不足、重回正軌、中肯中立，否則不滿港台嘅聲音只會愈嚟愈大，要求資源投放喺其他地方嘅呼聲都會愈嚟愈高。講到咁，廣播處處長梁家榮收唔收到呀？
港台問題多籮籮，舊年嘅審計報告就踢爆港台電視節目悶爆人，收視率奇低，電台聽眾人數插水，教育電視製作費太高昂等。其實港台都被外界鬧爆係大花筒，幾年前曾提出興建造價六十億元嘅「天價」新大樓，但被立法會工務小組彈番轉頭，減磅至五十三億元都唔收貨，之後同政府化驗所嘅聯用大樓計劃又終止，點知之後又再開位處理新大樓相關事務，將副廣播處長（發展）編外職位轉為副廣播處長（行政及發展）常額職位，遭到強烈批評。