中環出更：廠商會吉林遊 吳國安：大飽眼福
香港天文台平日就會監察空氣污染指數，但原來不同地方都監察不同指數。香港中華廠商聯合會（廠商會）近來去咗吉林考察五日四夜，仲順道遊覽長白山天池等多個著名景點，副會長吳國安（安哥，Dennis）話，長白山有負離子實時監測紀錄牌，如果好大聲講嘢或者人多，度數會隨即下降。負離子都要監察o架？
紀錄牌實時監測負離子
Dennis話，負離子其實對人體好，長白山有呢個實時監測紀錄牌咁特別，佢都有影低。佢又話，已經去過吉林三次，覺得當地道路設施改善咗，加上獲當地招待，佢哋唔使點排隊，由長白山旅遊區出發，唔使一個鐘左右就到達天池，今次係佢首次親眼見到天池，當日仲要天朗氣清，真係大飽眼福，大讚好值得去睇。
去到長白山，就唔止去天池啦，安哥話，廠商會會長吳宏斌喺長白山用大錘仔鑿糯米，呢啲糯米係用嚟整糖不甩嘅，而安哥自己都有用支錘仔鑿糯米，不過鑿咗好短時間就無繼續鑿，因為怕阻住人做生意喎。
其實今次廠商會代表團去吉林考察，其中一個行程就係出席中國每逢兩年舉辦一次嘅「東北亞博覽會」，今次考察都係為咗探討吓兩地合作嘅商機，順道遊覽景點。會董黃偉鴻（Ellis）都有一齊去，今次係佢首次去長白山，覺得天池景色難得一見，大開眼界。Ellis又話，天池嘅溫度得幾度，同山腳相差成十度，所以喺天池工作嘅保安着咗好多衫，包到成身都係。
長白山有「骨質疏鬆森林」
佢又話，今次仲有去長白山嘅地下森林，形容係「骨質疏鬆森林」，因為地底係火山灰，樹根唔能夠深入生長，會比較容易折斷同倒下。整個行程中，其中一樣難忘嘅事，就係喺長白山酒店同一支有六十五年歷史、價值九萬元嘅野生人參合照，佢話如果斷咗就一文不值喇。咁又係嘅，人參同古董花樽一樣，爛咗就唔值錢同賣唔出，真係要小心存放至得。
卓妮